ISUA KRISTA LO KAL LEHNA LEH SAKAWLH

        Kristian te kan vanneih bik em em na chu kan rin ber Isua Krista hian a lo kal lehna min tiam hi a ni (Thup 22:12; John 14:3). A lo kal lehna ni erawh a hunbi thup tlat a ni a, mahse, a lo kal lehna a hnai tawh tih kan hriat theihna turin chhinchhiahna erawh tha takin min pe ve thung a ni. (Mat 24:3-51)

        Pathian thuin a sawi angin mi tam tak ten Isua lo kal lehna hi an ring lova, a tira ring te zingah pawh ring chhunzawm ta lo tam tak an awm bawk a ni, mahse, tirhkoh Petera chuan Isua hi a thutiam ang ngeiin a lo kal leh ngei dawn a, tunah hian mi zawng zawngin kan sual kan sim a, a lam kan hawi theihna turin keimahni avangin a lo la kal lo chauh a ni tih min hrilh a ni (II Pet 3:9)

A lo kal leh hun tur -

    Hmanlai atangin mi tam tak ten Isua lo kal leh hun tur hi an chhut thin a (II Pet 3:4), Mizoramah ngei pawh mi thenkhat chuan - Kum 1993 October thlaah a lo kal dawn, kum 1994 ah a lo kal dawn ti te kha an awm thin a nih kha. Mahse, a hun leh ni thu hi keinin kan hriat theih a ni lova, chumi avang chuan inring renga awm turin min hrilh zawk a ni (Mat 24:36; Marka 13:33; Tirh 1:7; Luka 12:40)

A chhut dan tur -

        A hun leh ni, darkar tak hre thei lo mah ila Isua lo kal lehna hi a hnai tawh em tih kan hriat theihna turin chhinchhiahna min pe a (Marka 13:8; Luka 21:11), chungte chu - lir a nghing a nghing ang, tam a tla ang, hri a leng ang, ram leh ram an indo ang, chung lam vanah thil mak tak tak a lo lang thin ang. A zavaiin chhui vek hman lo mah ila heng chhinchhiahna te hi khawvel hmun tinah a thleng mek zel a ni tih erawh fiah takin kan hmu reng a ni.

        Heng baka Isua lo kal lehna chhutna pawimawh deuh chu “Sakawlh a lo lang tawh em?” tih hi a ni (II Thes 2:5-8). Sakawlh lo lanna tura khaptu lakbo a nih veleh Sakawlh a lo lang ang a, Sakawlh a rawn lan hunah Lalpa Ni ropui leh rapthlak, leilung zawng zawnga fiahna hun hi a la thleng dawn a ni. Mahse, kan hriat reng tur erawh chu Sakawlh hi a lo lan veleh a kawlh nghal dawn lova, he khawvela kum 7 a awm chhungin thla 42 chauh a kawlh dawn a ni (Thup 13:5).

Sakawlh chu tunge? -

        Bible ah hian sakawlh chungchang hi Daniela lehkhabu (Dan 7:4-6) leh Thupuan (Thup 13:1, 17:12) ah te kan hmu a, sakawlh sawi nan hian therion (Greek) hman a ni a, ramsa kawlh emaw, sa hlauhawm emaw sawina a ni a, hei hian sakawlh chu hlauhawm tak leh mi tihhlum hmang a ni tih a tifiah nghal a ni.

        a) Sakawlh hi pahnih kan hmu a, pakhat chu tuifinriat atanga lo chhuak a ni (Thup 13:1), Tuifinriat chu mipui, hnam te, mite, tawngte a ni a (Thup 17:15), chuvangin he sakawlh hi mipui thlan lal, mipui chunga lal ni tura lo awm tur a ni tih a lang.

        He Sakawlh sawi nan hian tawngkam dang, Krista dodaltu (I John 2:18,19), Misual (man of sin), boral fapa (son of perdition) leh dan bawhchhepa (lawless one) (II Thes 2:3,9 - Paula), Titiautu tenawm (Mat 24:15 - Lal Isua) tih te hman a ni bawk thin.

        b) Sakawlh pahnihna chu lei atanga lo chhuak a ni a (Thup 13:11), beramno ki ang, ki pahnih nei, mahse, Dragon tawng anga tawng si a ni. Beramno chu Isua Krista sawina a ni a, chumi awmzia chu he sakawlh hi Krista Der (Antichrist) a ni ngei dawn tih a lang a ni (I John 2:18, 4:3, Thup 16:13, 19:20, 20:10) Sakawlh sawrkar thurualpui tu tur, sakhaw hruaitu tur niin, a thlah tute Pathian a pawisa lovang (Dan 11:37) tih a ni.

        c) Sakawlh chu Diabola (Dragon, rulpui tar - Thup 12:9) thiltihthehna, a lalthutphah leh a thuneihna nasa tak pek a ni ang (Thup 13:4). Chu chuan Sakawlh chu mi ropui tak leh thiltithei tak, fing tak a nih tur zia a ti lang

        d) Sakawlh chu awm tawh zet a, awm leh ta lo (Thup 17:8), thihpui khawp hial hliam dam leh a ni ang. Chu chuan Bible chhunga hmanlaia Lal ram ropui tak lo ding tawh thin, nasa taka tlusawp tawh lo ding thar leh tur a ni tih a ti lang bawk.

Sakawlh chet hun -

        Sakawlh hi a lo lan veleh a kawlh nghal dawn lova, thuhretu pahnih (Thup 11), ni 1260 = thla 42 = kum 3½ chhunga Israelte tiharh a, hawikir tir tute an chet zawh hnuah chauh thla 42= ni 1260 = kum 3½ tho a che ang (Thup 11:3). A awmzia chu a lo lan atanga thla 42 chhung chu kawlh lovin thuthlung nghet tak a siam ang a, remna duh tu ang maiin a awm dawn a ni. Mahse, hapta chanve (thla 42) chauh chutiang chuan a awm ang a, thla 42 a ral veleh inthawina leh thilhlan te a ti bang ang a, Pathiana an vuah apiang a do ang a, amah chu lal leh pathianah a insiam ang a, a kawlh chauh dawn a ni (Dan 9:26; II Thes 2:4)

        A kawlh hunah chauh hian Sakawlh number a rawn chhuak ang a, chumi hmang chuan amah zui tute a chhinchhiah ang a, amah zui duhlo tu Israelte erawh tihduhdah in an awm dawn a ni (Thup 13:12-18)

        * He sakawlh chetna hi Jakoba manganna ni tih a ni a, chu chu Israelte tana buaina leh hrehawmna hun tihna a ni. An mangang au thawm leh an rum hrehawmna chuan Messia a ko eih ang a, Lal Isua leh a mithianghlimte chu Sakawlh paihthla tur leh Kumsang rorel tura rawn kal in, Lal Isuan Olive tlanga a ke a rawn nghah hunah he sakawlh tihduhdahna leh rorelna hi tih tawp leh hneh a ni ang (Jer 30:7, Zak 14:3)

        * Setana kum 1000 atan phuar a ni ang a (Thup 20:2), Israel mi, sakawlh tihduhdahna tuar a, pal tlang zawng zawng chhandam an ni vek ang (Rom 11:25,26). Martar-te thlarau lo tho leh te nen kum 1000 rorel a ni ang (Thup 20:4). Sual a awm tawh lovang a, intihnat a awm tawh lovang (Isaia 11:9)

Pumpelh tur an awm -

        He sakawlh rawn lanna hun hi a rapthlak em em dawn a, Sakawlhin Israelte a tihduhdahna piah lamah hian he khawvel pumpuiah Lalpa thinurna ni rapthlak leh hmingthang tak a lo thleng dawn a ni (Joela 2:11,31). Zawlnei Amosa phei chuan “Lalpa Ni duh tute u in chung a pik e, engatinge Lalpa Ni chu in duh, Lalpa Ni chu eng ni lovin thim a ni zawk e” (Amosa 5:18) a ti hial a, a aia rapthlak a awm leh thei tawh ngai lovang. (Thup 16:1-21)

        Khawiah mah himna a awm lovang a, Zawlnei Amosa’n a lo hrilh lawk “Mi, Sakeibaknei tlansana, Savawm tawk mi ang, inah a haw a bangah a kut a dah a, Rulin a chuk ang” a tih ang mai hian ramah leh Inah pawh himna a awm lovang (Amosa 5:19).

        Chutiang taka rapthlak tur chu a nih avangin he sakawlh hun chhunga tel ve lo nih hi thil chakawm tak a ni dawn a. Mahse, mahni duh avang leh chak avanga pumpelh ngawt theih a ni dawn lova, Lal Isuan pumpelh tur a sawi leh pumpelh theihna a sawi anga awm te chauhin an pumpelh dawn a ni (Luka 21:36)

Tute nge pumpelh ang? -

        Dan bawhchhepa (Sakawlh) hi a duh hun huna lo lang thei a ni ngawt lova, a lo lan theih lohna turin khaptu a awm tlat a ni (II Thes 2:6,7). Mi huaisen leh mi chak tak pawh nise an aia chak leh huaisen bulah an kawlh ngai lo ang hian Sakawlh pawh Setana thiltihtheihna zawng zawng nena che tur nimahse khawvelah hian a aia chak leh thiltithei a awm chhung chuan a kawlh thei dawn lo a ni. Setana thiltihtheihna hi nasa tak niin, thihna hi a thiltihtheihna vawrtawp, nakina tih borala la awm tur a ni (I Kor 15:26, 54,55).

        Nimahsela, thihna leh mitthi khaw kulh kawngkhar pawhin a ngam loh tur a awm a, chu chu Kohhran ngei hi a ni (Mat 16:18). Setana thuneihna tawp, thihna meuh pawhin a ngam loh tur Kohhran hi lak bova a awm hma loh chuan Sakawlh hi a rawn lang thei dawn lova, Sakawlh lo lanna hun rapthlak leh hrehawm tak a lo thlen hmain Lalpan a Kohhrante hi a la kiang dawn tihna a ni (I Thes 5:9)

Kohhran chu tute nge? -

Pathian hian chi leh hnam avanga inthliarna awm lovin, mi zawng zawng tan chhandam nih theihna kawng a hawng a (I Tim 2:4). Pathianin min thlanna a famkim theihna turin Isua chuan Israel hnam chauh ni lo, Jentailte nen lam pawl khatah, huang khatah, vengtu pakhat hnuaia min awmkhawm tir a tum a ni (John 10:16)

Chutianga huang khat, pawl khata kan awmna tur chuan Kohhran din ngei a tum ta a ni (Mat 16:18,19).

Tichuan, khawvela pawl zawng zawng ten kan pawm tlan vek angin Kohhran dik tak chu Pentecost Niah a lo piang ta a ni (Tirh 2:1-40)

Kohhran diktak pian dan chu “Isua chauh Lal leh chhandamtua pawm a, sualte sim a, Isua Krista hming ngeia sual ngaihdamna baptisma changa, Thlarau Thianghlim baptisma chang tute” hi an ni a (Tirh 2:38-40), chung mite chu tuiah leh thlarauva piangthar, fatir vana hming chuang Kohhran chu an lo ni ta a ni (John 3:5; Heb 12:23)

Tute nge sakawlh chu chibai buk ang?

        Sakawlh chibai buktu tur te hi UID nei, Ration Card nei, Chhiarpuia hming ziak tih lam a ni lo. Bible in min hrilh dan chuan Beramno nunna bu a hming chuanglo zawng zawng chuan Sakawlh hi chibai an buk vek dawn (Thup 13:7,8) tih a ni. Naupang atanga pitar putar thlengin Nunna bua hming chuanglo tawh phawt chuan an zui vek dawn a ni. Sakawlh hnung zui lo tur chuan Nunna bua kan hming a chuan ve a ngai tihna a nih chu!

        Engtinnge Nunna buah chuan kan hming a in ziah ve theih ang kan tih chuan, “Lalpan mitin hming a ziak hunah chuan, ‘hemi hi chuta piang chu a ni’ tiin a chhiar ang,” (Sam 87:6) tih ziak ang hian pianna hmangin Nunna buah hming kan ziak dawn tihna a ni a.

        Chu pianna tur chu amah Lal Isua ngeiin, “Mi tupawh, tuiah leh thlarauva an pian loh chuan Pathian ramah an lut thei lovang,” (John 3:5) a tih avangin tuiah leh thlarauvah kan piang tur a ni. Chu chu Tirhkoh Paula chuan, “Lalpa Isua Krista hmingah leh kan Pathian Thlarauvah tlenfai in ni tawh a, tihthianghlim in ni tawh a, thiam chang in ni tawh,” (I Kor 6:11) tih leh “Siamtharna silna leh Thlarau Thianghlim siamthat lehna chuan a khawngaihna ang zel zawkin min chhandam ta” (Tita 3:5) tiin min lo sawi sak a, chu ngei chu Thuthlungthar Kohhran lo piang te tih dan ngei kha a ni a (Tirh 2:38-40), Isua rin avanga sual sim hnuah, “Isua Krista hminga tuia hnima in baptis leh Thlarau Thianghlim baptisma chan” hi a lo ni ta a ni.

        Chuvangin, Unau duhtak, eng ang mi pawh ni la, he Lal Isua lo kal leh huna chhandama i awm theihna tur leh, Sakawlh lalrama buaina rapthlakin a nan ve loh na tur che chuan Kohhran dik tak, tuiah leh thlarauva piangah hian i awm ve a ngai a ni tih hria ang che. Chutianga kan awm lo a nih chuan he hun hnuhnunga Pathian thutiam lo thleng tur lakah hian kan him thei dawn lo a ni.