SIMNA
SIMNA
“II
Korinth 7:10– Pathian duhzawng lungngaihna chuan chhandamna tura simna a thlen
a, chu chu inchhirawm loh tak a ni”
A awmze
bulpui:
Simna
han tih hian awmze tam tak a nei thei awm e. Simna sawi nana an hman thin te
zingah metanoia (met-an’-oy-ah) – Simna hian a sawi tum chu ngaihthat lohna,
inchhirna leh pawitihna atanga ngaihtuahna thar nei a, awmdan hlui kalsantih
leh metanoeo (met-an-o-eh'-o) – Sim
tih hi kan bible a hman lar ber te an ni. Simna tih hian, kan tih thin tih tawh
loh satliah ringawt hi a kawk lova. Kan lo tih tawh thin kha a thatloh zia
hrechhuak a, kan lo tih tawh avanga inchhirna nen, chu sualna rahchhuah lo
thleng turte avanga lungngaihna nen, ti tawhlo tura Pathian lama thinlung
lungchhia nena hawikirna hi a awmze bulpui ber a ni (Tirhkohte 26:18).
Chuvangin, simna tih chu sual nih inhriatna, pawi ti taka sual avanga
lungngaihna nena tih tawh loh hi a ni.
A
pawimawhna:
He
simna hi Pathian thu chuan a
ngaipawimawh em em a.Thuthlung Hlui lam kan en chuan I Lalte 8:35 ah
chuan Lal Solomona chuan Thuthlung Bawm an lak kir a, Pathian biakbuka an dah
niah khan Pathian hnena a tawngtaina ah chuan,Israel miten LALPA mithmuh ah
thil an tih sual avang hremna an chunga a rawn thlen hunah, sima Pathian lam an
hawi leh huna lo ngaidam turin a dilsak tawh a ni. Joba pawh harsatna tam tak a
paltlang hnuah Pathian nen an inbiakna hnuhnungah chuan simtur neilo tur khawpa
mifel nia lang khan“Vut leh vaivuta thuchungin ka sim ta” (Joba 42:6)a lo ti
tawh bawk. Chutiang bawk chuan Israel te pawh LALPA in an sualte sim turin a
beisei tlat a, mahse, an sim duh si loh avangin Zawnei Jeremia pawhin a lo
tahpui tawh a (Jeremia 8:6), mahse, sualte sim a, hawikir a piangte chu Lalpan
felna a chhandam a lo tiam tawh tlat thung a ni (Isaia 1:27).
A
nihphung te:
1)Thinlung
inthlakthlengna a ni (Mat 21:29): Hei hian mihring ngaihtuahna a khawih a,
chutichuan chhandamna ah mihring a inlet leh tawh thin.
2)Pathian
lama lungngaihna (II Kor 7:7-14): Hei hian mihring phurna, thahnemngaihna lam a
keng tel thin. Entirnan, Chhiahkhawntu chuan Pathian mithmuha simna chu a âwm
chûmin a lantir (Luka 18:13). Hemi dinhmunah hian pawnlamah langchhuak tlem
mahse, chhungril lamah erawh a thawk nasa hle thin.
3)Thutlukna
siamna a ni (Luka 15:17-18): Hei hian mihring tumruhna lam a hawia, Fapa tlanbo
ang khan, sual tih thinte hawisan a, tisa lamah engmah in uaifual tir lova, a
harhchhuahna hun leh hmun ngei atanga Isua lam pan nghal duhna hi a a ni.
4)Sual
puanna a ni (Luka 15:21): Miin sual a la zepruk chhung chuan sim hian awmzia a
awm lova, Pathian hnenah sual puangchhuak a, keimahni sualna in pawm ngamna hi
a ni.Bawhchhiatna zeptute chu an hmuingil lo vang a, zep lova inpuanga
hawisantute chuan zahngaihna an hmu ang(Thufingte 28:13). Mihring hnena inpuang
turin min phut kher lova, Pathian hnenah erawh chuan kan sualna kan puan ngei
erawh min phut a ni, chu chuan tlawmna nun a keng tel nghal thin.
5) Sual
tlansanna a ni (Tirh 26:18): Sim tur chuan miin a sual a tlansan nghal a ngai
thin (Thuf 3:7). Suala la awmreng chunga tih tawhloh ah hian simna a kim
theilo.
6) Pathian
lam hawina a ni (Tirh 26:18): Sual kalsan mai bakah, laklawh nei hauh lova
Pathian lam hawi nghal hmak tur ani (I Thes 1:9)
7)
Thihna a ni (Rom 6:3): Simna chu sual thihsanna dinhmun a ni. Mitthi tawh hi
nasa takin tap hnap nen au mahila, an damlaia a tih thin ang leh a awmdan thin
anga a awm thei tawh ngailo ang hian, sual sim tu chu a awm tur a ni.
Sim loh
pawina te:
1) Sual
sim loh chu chatuana boralna ani (Luka
13:3). Sualngaihdamna chang thei tur chuan inchhira, simna nen min ngaidam
theitu hnen lam kan pan a ngai a, simna tel lovin ngaihdamna a chantheih loh.
2) Miin
sual a sim loh chuan Pathian lama hawi
theilo (Jeremia 2:22). Pathian chu thianghlimna a khat a nih avangin (IPet
1:18), thianghlim lohna leh fellohna fawmkem reng chungin Pathian nen a inrem
theih loh
3)
Thununna tawrhna a ni thin (Heb 12:11). Sual sim tha duhlo, thunun ngaia
awmreng te chuan Pathian vuakna an tuar thin (Thuf 3:12)
Kan
sualte simin, a hnen lam hawi ila, "LALPA chuan, "Hawh teh u, i
ngaihtuah tlâng teh ang u! In sualte chu sen lâr angin awm tawh mah sela, vur
angin a var ang; sen duk angin sen tawh mah sela, berâm hmul angin a awm
ang" (Isaia 1:18)tih hi kan tan a nih ve theih na turin kan puan ni lovin,
kan thinlung thler a, leihbaw theuh turin Pathian thu hian min beisei a ni.
A tha hle mai
ReplyDelete