Hla thiltihtheihna

Hla chu enge? 

Hla chu mihring rilru chhungril ber puanchhuahna, mihring rilru puthmang pholang a, khawvel thil a thlirdan leh Pathian rinna a a dinhmun tarlanna, mihringin a nun biru lai ber thlenga  a phawrhna hmanraw neih ropui ber a ni ti hialin kan sawi thei awm e. Hla chuan leilung leh a chhunga thilawmte mai nilovin, khawvel piahlam ram, thlarau khawvel thlengin a thlunzawm a. Thilsiam zawng zawngte dinhmun lailang a, khawvel nihphung zawng zawngte puangchhuaktu anih bakah, Siamtu Pathian rilru leh ngaihdan nia rinte thlenga tarlangtu  a ni.

            Tunlai khawvelah hian hla chi hrang hrang a tam ta hle a,sap zaithiam hovin Pathian fakna hlate baka hla chi hrang hrang an neihte Rock music, Heavy Metal Music, Pop Music, Rap Music, Disco Music, Jazz Music, Blues Music, Classical Music te bakah, Rock Music chhungah ringawt pawh hian chi hrang hrang Heavy Rock, Soft Rock, Alternative Rock, Industrial Rock te bakah Heavy Metal music chhungah mai pawh Death Metal, Speed Metal, Trash Metal te thlengin an la awm a.

            Keini Mizote pawh hian tunhma atang tawhin hla chi hrang Darpawngi Zai, Saikuti Zai, Awithangpa Zai, Chawngchen Zai, Salulam Zai, Puma Zai etc.te kan lo nei ve tawh thin a. Tunlai thangtharte hunah hi chuan hla lamah  kan lo hausak tak zawk avang hian hla chi hrang hrang te kan lo nei ta a, hlawm thumin, Pathian Fakna Hla, Hla Lenglawng, Lengzem Hla ti tein kan sawi ta.

            Heng Mizo hla kan hla sawi takte hian kan pi leh pute hunlai atang khan,vawiin ni thlengin Mizo nun chhungril ber ber hi an lo luah tawh a, thal khawro nisensa rumrut maite chu alo tihnem sak tawhin, Fur khawchhia, ruahtui tlak hrehawm lai berah  pawh hlimtakin thlawhhma kawngte alo zawhtir tawh thin a. Thal nisa vawl vawl atang te, fur khawchhia, khawpuiri leh tek tla ri in rawn awn awnna boruak phui mup atangte chuan  Favang zing nichhuak engmawi takte chu alo thlir tir tawh thin a ni. Chuvangin Hlate hian Pathian biaknaah a ni emaw, society-ah ani emaw engmah danglam chuang hauh lovin hmun pawimawh ber ber hi an lo luah tawh thin a, an la luah zui zel dawn a ni.

            Hla than chhoh dan

 Hla than chhoh dan han tih hian Kohhran awmhnu a Kohhran leh khawtlanga alo than dan sawi bik ta ila. Tunhma Kohhran hmasa hunlaiah kha chuan Pathian biaknaah Sam bu chhiar bak chu hlasak leh rimawi tumte an remti ngai lova. AD 367 a Laodikei khua a khawmpui chuan Pathian Biakina hman tur chin a ruat a, nimahsela hetah pawh hian Biakina hmeichhe zai leh rimawi hman chu ala khap tho a ni. AD 1400 hnulamah,’Thanharhna Hun’ (Renaissance) alo chhuah hnu hian Biakin a rimawi hman leh zaite an lo ching ta a. AD 1559 khan England lalnu Queen Elizabeth-i chuan “Mipui inkhawm tanna leh kharnaah tal hi chuan Fakna Hlamawi tha leh thluk tha sak ni thin rawh se” tiin thupek a chhuah ta hial a. Hei hian nasatakin hla leh rimawi dinhmun chu a chawikang ta a ni.

            Kum zabi sawmparuknaah chuan khawvel hi Hlaah leh Rimawi lamah alo thangharh leh zual ta a,chuvangin he kum zabi pawh hi “Hlimna Hun” (The Century of the Dance) tiin an vuah ta hial a. Puithiam ten Biakinah zirtirna tuihnanglo leh ro tak mai, dan ang leka an zirtirna nung silovin mipui mimir nun a tihchauhva, a tih mutthluk mek laiin miropui Martin Rinkard, Nahum Tate, Isaac Watts, N.Brady leh midang tamtak  te chuan hla thute hmangin mipui muthlute chu an rawn kai harh leh ta a. Zaipawl lamah pawh nasa taka hmasawnin J.S.Bach-a te, L.Beethoven-a te leh Halleluia Chorus siamchhuaktu G.F.Handel-a te ho an lo chhuak a. Pawl chi hrang hrang Symphony Orchestra te, Chambers Orchestra te leh String Orchestra an tihte chu an rawn chhuak ta zawih zawih mai a ni.

            Hla hi Pathian fak nan a tangkai a ni tih hriain Martin Luthera khan sawiselna nasatak a awm reng chung pawhin   Pathian biaknaah alo hmang tawh thin a. A ho hian Protestant Hlabu hmasaber niturin kum 1524 khan Hlabu an tichhuak ta nghe nghe a. A hnu kum 1861 khan John Wesley a ten an  zirtirna ‘Oxford Movement’ an tih a  lar vanglai takin hla 272 lai awmna ‘Ancient and Modern Hymns’  an tih chu an tichhuak veleh a. Hla a harhna kalzel avangin kum 1891 khan ‘Kristian Hlate Pa’ ti hiala an koh Ira D.Sankey-a chuan hla 1200 lai awmna ‘Sacred Songs and Solos’ tihbu chu a tichhuak veleh ta a, he hlabu hi keini Mizo te pawhin ‘Sankey Bu’ tia kan sawi thin hi a ni. He Hlabu hi chhuah anih atanga kum 50 chhungin England ramah mai pawh bu nuai zariat (800) aia tam an hralh a ni. He kum zabi chhung hian heti taka nasa hian Hla leh Rimawi hian hma a sawn a ni.

Hla hnathawh dan

            Hla chu leilung thil leh van boruak zam vel, chhemdam thlifim lengvel leh thal romei zing chiai mai te, ramhnuai dai reh riai maia luite tui luang ri ker kerte leh tuipui fawn ri inchhawk nghulh nghulh maite, chung vanrial rumri, kawlkil tawp atanga a tawp lehlam thlenga nghawr kal ruih ruih mai te leh, remna rimawi leh perhkhuang ri engmah tel lova nungcha hram thiam tinreng zai mawi ri leh suangtuahna mitthla a hmangaihna ram chamdel maite atanga lo piang a ni a. Chutiang tak atanga mihring rilru chhungril puakkehin a nghawr chhuah anih avangin mitin thinlungah hian a nung in hmun a chang sang a, mi a hneh awl a, tawngkama sawi aiin a thuk zawkin  a zau zawk a, a fiahin a chiang zawk thin, ngaihtuahna chau a chawikang a, suangtuahna thinlung khauh a tinem a, a zunzamin mi a phuar a, hmuh theih khawvel atang hian hmuh theihloh thlarau khawvel thlengin mi a hruai thin.

            Hla hi Pathian leh mihringte thlunzawmtu, leilung mawina leh khawvel thil tinrengte bakah, hringnun ze tinrengte phuarkhawmtu a ni a, mihringte tlinlohna zawng zawng pholang a, fakna leh chawimawina zawng zawng pawh mawi taka puang chhuak thintu a ni.

          Hla chuan Tawng thuhmunlo leh mizia engmah inhre tawn ngai hauhlo te pawh lungrualna tlangah mi a hruai khawm a,  thinlung hmunkhat puin lungrual takin hmangaihna hrui  mi a vawn za tir thin.

            Hla thiltihtheihna

 Hla thiltihtheihna hi a sang in a ropui em em a, silaimu hlauhawmnain a dang zolova, kulh ropui leh daidanna bang chhah  tak takte pawhin an dang zo heklo. Hmelma leh hmelma te pawh a inremtir thei a, indo mekte karah pawh remna palai hna a thawk thin. Chutih lai vek chuan Hla avang vek hian tharum thawhna leh innghirnghona a tam phah thei tlat bawk.

            Tumkhat chu Prusia ram (tunah Germany) sipaite leh an hmelma Poland ram sipaite chu indona dar a rik rual ruala inkap mai turin silai kausa kengin, Krismas dawn zan thla eng rehruih mai, thlasik khawvawt vur sur seng seng hnuaiah chuan an inep thup mai a. A khat tawkin vur ram sava hi khawhar awm takin a hram leh raih raih thin a, chubakah chuan sipaiho silai kau thawm leh position siamrem thawm mai chu hriat tur awmchhun a ni.

            Chutih lai tak chuan zan khawhar tak maia sipai duty chu Krismas boruak lunglenna chuan a rawn man ta, chu zan thla eng reh vawng vawng mai, thihnain thla a zar duaina hnuaiah chuan duty ani tih pawh inhre chang lo leh insum zo lovin,’Oh Holy Night’ tih hla chu thinlung takin a han sa chhuak ta phut mai a. Lehlam sipai duty pawh chuan engdangmah ngaihtuah hman hauh lovin hmelma lam duty hlasa chu alo zawm ve ta, chuveleh,midang a hria apiang chuan rawn zawm ve zelin, hmelma inkap mai tur an ni tih pawh hrechang lek lovin mahni camp atang theuhva rawn chhuak khawmin hlim takin he hla hi an sa rual ta thup thup mai a ni an ti, Hla thiltihtheihna hi ava ropui tehlul em! a then azar chauh I han chhui zui teh ang.

            (i) Kum 1881 nipui lai khan khualzin phur  lawnglian pakhat chu passenger tamtak phur chungin Washington khawpui atangin chhimlam panin Potamaic luipuiah chuan a kal ruau ruau mai a. Tlaini a liam a, zan thlaeng mawi tak mai chuan luipui tui chu a chhun tle sur mai a. Hetih lai tak hian passenger pakhat chuan lawng bathlarah rawn chhuakin chu zan thlaeng rehruih maiah chuan khawhar awm tak leh thiamtak mai si hian “Isu ka thla hmangaihtu, I hnenah min hruai zel rawh” tih hla hi a rawn sa ta vang vang mai a. A sak zawh chuan a chuanpui pa pakhat chu a bulah rawn kalin “Ka pu, min lo ngaidam la, indo lai khan sipaiah I tang em?” tiin ava zawt ta chawt mai a. A ni chuan “E, tang e, General Grant a hote zingah khan ka awm ve asin” tiin alo chhang a.

            A zawttupa chuan “Kum sawmpariat lai a nita, tun ang hun leh tun anga zan thlaeng hnuaiah in camp beih tumin ka rawn kal a, ka hriatsual loh chuan chumi zanah chuan nangmah ngei hi i duty a, i bul lawk atang khan i lu ah tak kah che tumin Rifle in ka tin che a,chutihlai tak chuan tuna i hlasak, “Isu ka thla hmangaihtu, I hnenah min hruai zel rawh” tih hi i han sa ta a,i zai lai  chu ka ngaithla ta reng mai a. Chang pakhat tawpa ‘Ka lu phentu neilo hi, I thlahnuai daihlim chuan khuh la’ (cover my defense less head with the shadow of thy wing) tih i  han sak tak chiah phei kha  chuan ka kap thei ta ngang lo che a, ka kir leh ta ringawt mai a ni” tiin a sawi ta a.

            Chuveleh chupa chuan a rawn kuah ta chawt mai a, “Unaupa, khami zan kha ka la hrechiang teh asin! Khatia duty a ka han awm veleh khan ka khua hi a harin ka lung hi a leng ta em em mai a, inlam leh thenrualte ka ngaih a zual a, hmelma karah awm kan ni a, ka dinhmun derthawnzia te ka ngaihtuah a, chutah chuan rilrua tawngtai chungin he hla hi ka sa ta a. “Ka lu phentu neilo hi,I thlahnuai daihlim chuan khuh la” tih ka han sak veleh ka thla alo muang ta huai a, awm pangngaiin ka awm leh thei ta a ni. A va mak em! ka tawngtaina chu tunah hian chhanin a awm ani tih ka hre chauh anih hi!” a ti a ni an ti.

            (ii) Africa hringei rama Missionery thawk E.P.Scott-a chu Pathian thuhrila a vahvel naah hringei hovin an man ta hlauh mai a, phur takin a sa ei tumin tihhlum an tum ta a. An tihhlum hma chuan Scott-a chuan “Khawngaihtakin reilote min lo nghak lawk ula, chumi zawhah chuan in duh ang angin min ti dawn nia” tiin a dil a, an remtih sak a. Ani chuan a tingtang chu a phawrh a, tawngtaia a inhlan zawh hnu chuan Edward Paronet-a hla phuah “Lal Isua hming I fak ang u, Angel chawimawia chu” tih chu muang fan raih leh urhsun takin a han sa ta a, hringeiho chuan ngaihnawm an ti ta hle mai a.

            A sa zel a, changlina, “Khawvela mize tinreng a, chitin awm bawk te u, Chawimawina zawng zawng pe ula, Lalber khumtir rawh u” tihlai a han sak thlen meuh chuan an rilru a hneh ta hle mai, thehmeh ang maiin an ngawi ta thap mai a. Mittui tla zawih zawih chunga a han sak nawn leh meuh hnu chuan hringei ho rilru chu alo tuiral zo ta!. Mittui dir zung zung chungin an fei te chu leiah chuan an dah a, rilru zawng zawng inlamletin, kumkhuaa Missionery thawhpuitu rinawm niturin Pathian kebulah chuan an inhlan a, chawimawina zawng zawng pein Lalber chu an khumtir ta a ni.

            (iii)Tumkhat chu London khawpuia milianho inkhawmnaah hian hmeichhe pakhat nawhchizuar ani tih hriat tak mai pakhat hi a rawn inkhawm ve nawlh mai a. Milianho chuan ten tih hriat tak mai hian an melh hrek hrek hlawm a. Chung zawng zawng chu Pastor chuan alo hmu ve vek si a, chu nu chu a awm ve reng chuan milianho chu an inkhawm zui duhlo mai ang tih a hlau ta a, chu nu hnenah chuan “Unaunu, hetah chuan rawn inkhawm velo mai teh, milianho hian an ten che a, i rawn inkhawm ve chuan an rawn inkhawm duhlo mai ang, hmundangah min kal bosan mai teh” ava ti ta chawt mai a.

            Chutia Pastor berin a han tihtakah chuan chu nu chu hrilhai hmel takin a ding ta reng mai a, a tawpah chuan beidawng takin Pastor hnenah chuan “Anih leh ka pu, helai velah hian keini ang misual inkhawm ve theihna tur hmun Biakin hi a awm ve em? Kei anga misual bawlhhlawh tan hian Isua chhandamna hi beisei ve ngam a ni ang em? Hetia ka awm ang ang hian pan ve ta chawt mai ila, min lo la pawm ve duh ang em?” tiin a zawt ta duah mai a. Pastor chuan “Insiam tha la,I sualte sim la,ala ngaidam duh ang che” tiin a chhang a. Chu thu a han hriat chuan chu hmeichhia chuan chuan beidawng takin “Keimah chuan ka insiam tha thei tawhlo anih hi, khawngaihna atangin anih ngawt loh chuan sualah ka tang a, ka chhuak thei tawhlo a ni” a ti nguai ta raih mai a.

            Chutah zet chuan Pastor thinlung chu William Copper-a hlaphuah,”Immanuela a thi zaman thisen lui a luang chhuak”tih hla a “Thisen lui chu ka lo hmuhin khawngaihnain a khat, Chatuan pawhin a kang lovang misual faina lui chu” tih lai tak hian a rawn deng harh ta zawk mai a. Mittui tla zawih zawih chunga hmeichhia chu kuahin “Unaunu, khawiahmah i  kal a ngai lovang, Gilead-ah thinghnai damdawi  i tan a awm e. Thisen lui chu khawngaaihnain a khat, Chatuan pawhin a kang lovang, Amah pantute chu tumah a hnar ngai lova, pawm duhloh a nei ngailo” a ti ta a ni an ti. Hla leh a thiltihtheihna hi ava ropui em!

            Ni e, Hla hian mibeidawng tawhte tan beiseina hmathar a chhawp chhuah sak a, rinna kawnga hliam tuar leh chaute pawh a tuam damin an tanna khur thuk tak ata a kaichhuak thin. Mihring hlimna leh lawmna inchenlo tak takte leh dinhmun in anglo tak takte pawh angkhat veka hrutrualtu a ni a, mi lungngai ber berte leh mihlim ber berte pawh ngaihtuahna hmunkhat leh dinhmun inanga siam a, amah Patea’n ‘Khawvela I siam zawng zawng zai se’ a tih ang mai a an zavaia lawmna luipui kam a hruai thleng veka,fakna hlamawi saktir vek theitu a lo ni.

(Evan Vanlalliana Seminar paper atanga lakchhuah a ni)