Isua Thawhlehna Thiltihtheihna
THAWHLEHNA THILTIHTHEIHNA
“Tin,
vantirhkoh chuan hmeichhiate chu a bia a, an hnenah, “Nangni chuan hlau suh u.
Isua, an khenbeha kha, in zawng
tih ka hria e. Hetah a awm tawh lo ve;
a sawi ang ngeiin a thawhleh tawh
kha. A mutna hmun hi rawn en teh mah u.”
Matthaia 28:5, 6
Isua Krista, thihna hneha a thawhlehna ni ropui tak kan lo
thleng leh ta a, kan rinna hian a lo pian tirh atangin dona leh beihna tam tak
a tawk thin a, engtinnge kan rinna hi a dik bik a ni tih kan pawm? Kan rinna hi
innghahna tlak a ni tih engtinnge kan finfiah theih ang? Kan rinna hi rinna
dang zawng zawng aiin a pawm tlak a ni tih engtinnge kan sawi theih ang? Heng
zawng zawng chhanna hi Lal Isua Krista thawhlehnaah hian a awm vek a ni.
Thil mak tak chu
kan rinna kawnga kan innghahna lian ber Isua Krista thawhlehna hi a puangtu leh
sawitu hmasaber chu Isua ringtute ni lovin Isua ringlo tu, amah tihhlum duh tu
leh do em em tute an ni tlat mai a ni. Rinna venhimna kawnga thawhhlawk em
em tute, Evidentialist an tihte chuan he thawhlehna hmang hian
Isua Krista rin a dik zia te, Pathian a awm ngei zia te, Bible hi sakhaw dang
zawng zawng aiin a dik zawk a ni tih te an puang thin a ni.
• Thawhlehna hian Isua Krista hi Lei leh van lalber a ni tih a ti
lang a, engkim siamtu leh engkim chunga thuneitu a nih zia a ti lang -
Pathian pakhat,
thil engkim siamtu leh engkim chunga thuneitu a awm a (Isaia 44:24, 33:22).
Isua Krista, thihna hneha tholeh a hian lei leh vana thuneihna zawng zawng a
nei a, thihna leh mitthi khua in a chelh hlen rual loh in a tholeh a ni.
• Thawhlehna hian chhandamna kan neih theih nan Isua hming lam
ve theiin min siam -
Thawhlehna hian
rinna satliah ni lo, chatuan nunna nei thei tura rinna min pe a, 2Timothea 1:8-10
kan chhiar chuan Pathian khawngaihna avanga chhandamna hi Isua Krista
thawhlehna avanga tihlan, kan tana pek a ni tih chiang takin kan hmu a ni.
• Thawhlehna hian Setana chu kan ke hnuaiah min dah sak a ni -
1 Korinth 15:13
chuan, “Mitthi thawhlehna reng reng a awm
si loh chuan Krista pawh kha kaihthawhin a awm lo vang,” tiin min hrilh. Setana thiltihtheihna sang ber chu thihna hi a ni (Mat 10:28,
Johana 10:10). Isua thihna hmangin lei leh vana roreltu nih theihna a beisei a,
nimahse Pathianthuin 1Kor 15:36,37 a a lo sawi tawh, thihna kaltlanga nunna
thar chu Lalpa Isua zarah kan lo neih theih phah ta a, Setana thiltum chu
thihna hmanga paihthlak a ni a, thihna in thihna chunga thuneitu Diabola chu
hnehin a lo awm ta a ni (Heb 2:14)
• Thawhlehna hian Pathian lama midangte kaihruai thei turin min
siam -
A thawhleh hnua Lal
Isua thusawi chu, “Lei leh vana thuneihna zawng zawng ka hnenah pek a ni
tawh, chutichuan kal ula...,” tih hi a ni. A thuneihna leh
thiltihtheihna hmang tangkai chunga midangte zirtira siam turin min tir a ni.
Chu thiltihtheihna chu -
* Thihna ata Jaira
fanu leh Lazara kaitho tu kha a ni a
* Ramhuai
hnawhchhuah theihna kha a ni a
* Phar, kebai,
bengngawng, mitdel leh damlo tam tak tidam tu kha a ni a
Chu thiltihtheihna chu vawiin thlengin a la pangngai reng a, kan
la kawl reng a, midangte tan Lalpa lamah kawng sial sak tu kan nih theih phah a
ni.
* Thawhlehna hian Thlarau Thianghlim kan chan theihna kawng a
hawng -
Isua ngeiin,
“Jerusalem kalsan suh u, Pa thilthiam lo thleng tur ka sawi kha lo nghak rawh
u,” a ti a, chu chu mi zawng zawng tan a ni a, tisa a put lai ni a liam a,
thlamuantu Thlarau thianghlim niin kan zingah a la awm ta reng a ni.
*Thawhlehna
hian tlanna a tinghet -
Sualbawiha tang, chhanchhuah ngai te kha
chhandam theitu Pathianin kan tan tlanna min siam sak a, sualbawiha kan awmna
ata min tizalen a, a thihna thisen chhuak hmang khan tlanna min pe a ni (I Tim
2:5,6). Chumi tlanna zarah chuan chhandamna a lo thleng a, Isua hmingin
simna leh sualngaihdamna thu chu khawvel ram zawng zawnga hril turin min pe
ta chauh a ni.
Lalpa
Isua kha thlarauva, nunna thar nen a tho leh a, heng thiltihtheihna te hi min
hnutchhiah a ni. Chuvangin, he
thawhlehna thiltihtheihna hmang hian Krista tana chak zawka thawk turin tan ila
theuh ang u.
Comments
Post a Comment