UID LEH SAKAWLH CHHINCHHIAHNA

UID LEH SAKAWLH CHHINCHHIAHNA

                                                                                                                       

                                                                                                                        - Evan. K. Vanlalhlimpuia

                                                                                                                          Bawngkawn

UID chu engnge ni?

            UID tih chu ‘Unique Identification’ tihna mai a ni a, unique tih chu danglam bik, a anpui thildangte lakah pawh mak bik tihna a ni mai a, Identification tih chu hriat hran theihna tura chhinchhiahna/hmehbelna tihna a ni leh mai. Tichuan, UID tih awmzia chu “Midang laka hriathran  theihna tura a danglam bikna hmanga chhinchhiahna” tihna a nih ber chu. UID ah chuan a neitu chhinchhiahna thil pathum - Kutzia (fingerprint), Mit naute thla (iris scan) leh hmel lanna thlalak te dah a ni.

            UID hian chhinchhiahna la awm ngailo, kan taksa ah rawn dahin chhinchhiahnan a hmang a ni lova, a tir ata Pathianin mitina a dahsak sa, midang laka a danglam bikna lai tak, tumahin a ang an neih ve loh ang kha lachhuak in, UID card a chips-ah khan an dah chhuak mai zawk a ni. UID i nei emaw, neilo emaw, chhinchhiahna, danglam bikna chu i nei sa tawh hrim hrim a, chumi belhchhah nan chuan khua leh tui nihna chhinchhiahna number (NPR number), UID code number an dah belh mai chauh a ni.

UID chu engtia hman nge a nih?

            India hi a ram pum anga UID hmanga khua leh tui zawng zawng chhinchhiah tura hma la hmasa ber a ni (NTEB News desk, 12th January, 2012). He programme hi National Biometric ID Processing Programme tiin an sawi a, January, 2009 atang khan hmalak tan a ni. Tunah hian Inique Identification Authority of India (UIDAI) in hma a la mek a ni. Anni hi UID vawng khawmtu leh a number (AADHAAR), digit 12 lo pe tu an ni a, Biometric Information System hmangin database hi an vawng a ni.

            Hetianga hmalak a nihna chhan lian ber chu fing taka pawikhawihna leh inbumna te laka ram a him theihna tur leh mi diklo te laka khua leh tui te an hum theihna tur hi a ni ber. Nakinah chuan insumdawn tawnna leh sum leh pai chetvelna kawngah pawh awlsamna nasa tak min la siam tu pawh a ni thei ang (http://www.nowtheendbegins.com/blog/?p=7976).

            He chhinchhiahna hian India khua leh tui, kum 18 tling tawh a piang te a huam dawn a ni. Citizenship Act, 1955, Section 14A chuan khua leh tui zawng zawng te National Population Register (NPR) hnuaiah in register vek turin a phut a, NPR hi kum 2010 a, India khua leh tui chhinchhiah tawhte chanchin vawn thatna tura, Citizenship Act 1955 leh Citizenship Rules 2003 hnuaia programme siam a ni.

            Amaherawh chu he programme ah hian in tihluihna a awm lova, mimal duhthlanna ah a innghat thui viau a, mahse, India lo hi ram dang kan neih si loh avangin a neilo nih erawh harsatna tam tak awm thei a la nih zel hmel a, neih ngei a tul zawk hial ang. Chutih lai chuan state thenkhat, central sawrkar ruahmanna hriatchian tawkloh avanga tihluihna anga lo kalpui te erawh an awm a, hemi avang hian Karnataka, Chandigarh, Chennai leh Mumbai ah te pawh 2012 khan sawrkar lakah PIL file a lo ni tawh nghe nghe.

Sakawlh chu

            Bible ah hian sakawlh chungchang hi Daniela lehkhabu (Dan 7:4-6) leh Thupuan (Thup 13:1, 17:12) ah te kan hmu a, sakawlh sawi nan hian therion (Gk) hman a ni a, ramsa kawlh (wild beast) emaw, sa hlauhawm (monster) emaw sawina a ni a, hei hian ram sakawlh leh hlauhawm anga mi tihhlum hmang a kawk nghal. Heti hian tawite in i han khaikhawm teh ang.

            * Sakawlh hi pahnih kan hmu a, pakhat chu tuifinriat atanga lo chhuak a ni (Thup 13:1), Tuifinriat chu mipui, hnam te, mite, tawngte a ni a (Thup 17:15), chuvangin he sakawlh hi mipui thlan lal, mipui chunga lal tura lo awm tur niin a lang.

            * Sakawlh sawi nan hian tawngkam dang, Krista dodaltu (I John 2:18,19),  Misual (man of sin), boral fapa (son of perdition) leh dan bawhchhepa (lawless one) (II Thes 2:3,9 - Paula), Titiautu tenawm (Mat 24:15 - Lal Isua) te hman a ni bawk thin.

            Sakawlh pahnihna chu lei atanga lo chhuak a ni a (Thup 13:11), beramno ki ang, ki pahnih nei, mahse, Dragon tawng anga tawng si a ni. Beramno chu Isua Krista sawina a ni a, chumi awmzia chu he sakawlh hi Krista Der (Anti-christ) a ni ngei dawn in a lang a ni (I John 2:18, 4:3, Thup 16:13, 19:20, 20:10) lei chu Israel sawi nan hman thin a nih avangin he sakawlh hi Israel hnam atanga rawn chhuak, Sakawlh sawrkar thurualpui tu tur, sakhaw kalsual hruaitu tur niin a lang. A thlah tute Pathian a pawisa lovang (Dan 11:37) tih a ni.

            * Sakawlh chu Diabola (Dragon, rulpui tar Thup 12:9) thiltihtheihna, a lalthutphah leh a thuneihna nasa tak pek a ni ang. Chu chuan Sakawlh chu mi ropui tak leh thiltithei tak, fing tak a nih tur zia a ti lang

            * Sakawlh chu awm tawh zet a, awm leh ta lo (Thup 17:8), thihpui khawp hial hliam damleh a ni ang. Chu chuan Lal ram lo ding tawh thin, nasa taka tlusawp tawh lo ding thar leh tur niin a lang.

            * Sakawlh hi thuhretu pahnih (Thup 11) ten, ni 1260 = thla 42 = kum 3½ chhunga Israelte tiharh a, hawikir tir tute an chet zawh hnuah thla 42= ni 1260 = kum 3½ tho a che ang (Thup 11:3)

            * Mithianghlim lawr a tello, Beramno nunna bu a hming chuanglo zawng zawng chuan Sakawlh hi chibai an buk vek dawn (Thup 13:7,8)

            * He sakawlh chetna hi Jakoba manganna ni tih a ni a, an mangang au thawm leh an rum hrehawmna chuan Messia a ko eih ang a, Lal Isua leh a mithianghlimte Kumsang rorel tura rawn kal in, Lal Isuan Olive tlanga a ke a rawn nghah hunah tih tawp/hneh a ni ang (Jer 30:7, Zak 14:3)

            * Setana kum 1000 atan phuar a ni ang a, sakawlh tihduhdahna tuar a, pal tlang zawng zawng chhandam an ni vek ang (Rom 11:25,26). Martar-te thlarau lo tholeh te nen kum 1000 rorel a ni ang (Thup 20:4). Sual a awm tawh lovang a, intihnat a awm tawh lovang (Isaia 11:9)

UID leh sakawlh, ringtute tan a hlauhawm lo

            Sakawlh lo lanna tur atan hian nasa takin a kawng sial a ni tawh a, a ni mek a, a la ni zel dawn bawk (II Thes 2:7). UID (Bio metric enrollment) kher ni lo IT leh technology hrang hrang te hi sakawlh tan chet ti awlsam tu an la ni vek thei a, chumi avanga buana hma a lo kherh lawk vak erawh mahni intihbuaina satliah mai mai a ni.

            Kan tana a hlauhawm lohna te heti hian i han khaikhawm zuai teh ang:

1. Sakawlh number, mi a chhinchhiahna tur chu digit thum a ni a, UID erawh digit 12 lai a ni

2. UID chu India khua leh tui, kum 18 tling chin te chhinchhiahna tur a ni a, sakawlh chhinchhiahna erawh a pui a pang, a lian a te a neih vek tur a ni

3. UID number leh a card a personal information te hi inang a awm miah lova, sakawlh number erawh mi zawng zawng tan a inang vek hman a ni ang

4. Sakawlh hi sakhua zawng zawng, Pathiana an vuah zawng zawng nen a do tu tur a ni a, India sawrkar erawh sakhaw tih bik nei lo ram, secular state a ni.

5. UID chhinchhiahna chu pawnlam atanga min rawn pek ni lovin, keimahnia chhinchhiahna awm tawh sa hmanga chhianchhiah a ni a, sakawlh chhinchhiahna erawh keimahni a la awm ngailo, pawnlam thil hmanga chhinchhiahna a ni thung ang

6. Sakawlh chu thihpui khawp hliam tuar tawh hnu, awm tawh zet a, awm leh ta lo, dam leh tur a ni a, India erawh chutiang a la ni ngai lo.

7. Sakawlh chu khawthianghlim, Jerusalem do tu tur a ni a, a do turah Jentelte kan tel ve lo

8. Sakawlh chetna turah hian daltu/khaptu, Thlarau Thianghlim in a chenchilh reng, Kohhran hi a la awm a, chu chu lak kian a nih hunah chauh sakawlh hi a chet dawn avangin ringtu diktak te tan a hlauhawm loh (II Thes 2:7)

9. Ringtu diktak te chu sakawlh chet hmaa chunglamah sengchhoh tur kan nih avangin sakawlh chhinchhiahna leh hnathawh te hi kan tan a hlauhawm loh (I Thes 4:13-18)

            He khawvela thilthleng, hun hnuhnung chhinchhiahna zawng zawng te hian kan rinna ti nghing lo se, nghet takin, khawihchet rual lohvin Lal Isua tan, Kohhranah kan awm tlat reng tur a ni. Amah, Lal Isuan,”Ka chhelna thu i pawm avang khan leia awmte fiah tura khawvel zawng zawng chunga fiahna hun lo thleng tur lakah chuan kei pawhin ka humhim ang che” (Thup 3:10) a tih hi a rinawm tawk a, a pawmawm em em a ni. Tin, Pathian hian, Thuthlung Hlui hun atang tawha khawvela hremna leh chhiatna thleng reng rengah hian ringtu, amah hmangaih tute hi chhanhim lohvin a chhuah ngai lova, hremna leh buaina a pumpelh tir zel bawk thin (Gen 6, 18, Exo 12 etc.)

            “Ringhleltu chu tuifinriat fawn thli chhem len leh vawrh ang a ni si a” (Jak 1:6) tih ang hian, engemaw hlek a hlau a phu dual dual ringtu nih hi thil hlauhawm tak a ni. Hmanrua reng reng a hmangtu zira hlauhawm leh thalo a ni thin ang chiah hian, chhinchhiahna leh thildang reng reng pawh, a ti hlauhawm leh ti thalo tu ber tur, Sakawlh lo lan hma hauha lo hlauh lawk vel hi kan tih loh tawp tur a ni. Khua leh tui tha kan nih theihna turin thuneitute thu awih hi ringtuten kan tih ngei tur pawh a ni tih hria ila, kan hriatchianloh leh a ngaihna kan hriatloh luat avanga buai mai lovin, kan tana Lalpa’n rawngbawltu min dah sak te thu leh Pathianah innghat tlatin, Kohhrana rinawm taka awm hi kan himna a ni tih hriatreng tur a ni. He khawvelah hian Kohhran chiah hi chhe theilo, thihna leh mitthi khaw kulh kawngkhar ten an ngamloh tur awm chhun a ni e (Mat 16:18,19)

Lalpan malsawm rawh se