THUTHLUNG

THUTHLUNG

(Brief study of its Meaning, Etymology, Development, Importance & Implementation)

                                                                                                -Evan. K. Vanlalhlimpuia

                                                                                                Bawngkawn

A awmze tlangpui leh a lo than chhoh dan:

            1) Thuthlung tih chu mi pahnih kara inremna emaw intiamna emaw tihna a ni. Thuthlung Hlui lama Hebrai thumal Berith tih hi thuthlung ti a lehlin a ni. Hei hi Assuria thumal biritu (phuar, thlung) nen a inang. Berith awmze bulpui chu bawhkan, nuaibo, tikiang tihna te a ni a, chuti a nih chuan Thuthlung tih chu nuaibona, tihkianna tihna a ni ta a nih chu. Inremna tih a nih rual hian, thupek lam a hawi mah zawk ang. Ran talh a, phel hniha zai phel a, intiamna neitu pahnih ten thuthlung an siam en pawh a a kawhtum a inang reng (Jeremia 34:18,19)

            Thuthlung Thara a thu milpui chu Greek tawnga Diatheke tih hi a ni a, chu chu thurochhiah ti a lehlin a ni thin. Chu chu Thuthlung Hluia Berith tih nen thu awmze in ang reng a, hetianga lehlin zel hi BERITH tlukpui a nihna tur atan chuan duhthusam ber a ni.

Thumal hrang hrang te:

            Thuthlung tih hi Bible version hrang hrang ah heti zat theuh hi kan hmu : KJV - 292, NIV - 297, NKJV - 335, NASB - 336, RSV - 308, ASV - 311, AB - 323, DRB - 266. Thumal pawimawh tak, thihna leh nunna khawih atana hman thin a ni.

            Thuthlung Hlui lama thumal hrang hrang an hman kan hriat theih engemawzat a awm a.  Thupek/intiamkamna (misw�t ), urhsun taka intiamkamna (seb���), ), thutiam lak na (ni�ba�), malsawmna (berak�), anchhia (�al�) tih te an ni. Hengah te hian hriatpuitu atana a hranpa a Pathian kohna a awm lem lova, a chhan chu thuthlung siamtu Pathian kha hriatpuitu a nih nghal vang a ni. Mahse, thildang "witnesses" (�ed) tilangtu atan lung an phun thin (Gen 31:52). Khermei taka thumal pakhat an hman thin karat ber�t (Pathian thuthlung - Gen 15:18; Ex 24:8; Deut 4:23; 5:2; 2 Kings 17:15; Jer 11:10; Ezek 34:25) hian "thuthlung siam" a kawk vek thin. Bawhchhiat loh tur, vawn tlat tur atan thuthlung chu siam mahse, a tu emaw zawk chuan an bawhchhe ve fo thin (Ezek 17:15,18)

            Pathian chu a meizanghlaptu ni in, heng thumal verbs hrang hrang "establish" (heq�m) Gen 6:18; 9:11; 17:7; etc. "grant" (natan) Gen 9:12; 17:2; Num 25:12, "set down" (s�m) 2 Sam 23:5, "command" (siww�) Josh 7:11; 23:16; 1 Kings 11:11 an hman thinte hian noun, ber�th hi a keng tel zel thin.

Hmanlai history a mihring inkara hman dan:

            Hmakhawsang atangin mihring leh mihring inkarah inremna thuthlung an lo hman dan document tha tak tak hmuhchhuah tawh a ni. Hengte hi sakhaw nena inkaihhnawih na nei hnam te an ni tlangpui thin. Intiamkamna nei pawl pahnih te chuan an pathian te hmingin thutiam an la thin a, hriatpuitu ten chu chu an nemnghet thin. Chutiang inremna urhsun tak te chu mimal, chibing, ram then khat leh hnam te inkarah siam a ni thin. Khawvel Ancient History a inremna harsa ber leh urhsun ber ni a ngaih chu khawvel huap inremna, Hit ho leh Egypt ho in an siam kha a ni. Mahse, heng zawng zawngah hian thutiam urhsun, pawl khatin pawl dang nen an siamah hian rinawm tura intiamkamna hi an innghahna bulpui a ni. Thuthlunghlui a thuthlungte pawh hi Ancient Near East a mi te nen pawh a inang hlawm tlangpui. Hengte hi Asia Minor a Hittites te, Mediterranian tuipui kam a Ugarit ho te, Euphrates luipui bula Mari hnam ho te leh Assurian ho te chanchinah kan hmu a ni.

            Kum zabi AD18-na laia an hmuhchhuah Mari Document an tih mai ah chuan thuthlunna atan hian Sabengtung an talh thin a, chu chu inremna an siam dan a ni thin tih kan hmu (Picture-1). Chutiang ang chu Roreltute 4:17; ISam 7:14; ILalte 5:12; ILalte 5:26 ah te kan hmu. He document a thumal dang, "inremna Sabengtung talh" tih hi Hebrai hovin "inremna thuthlung siam" an tih nen a nihphung a inang reng a ni (Ezek 34:25; 37:26).

            Hittite ho Lalte leh an ram awp te inremna ah chuan lalte leh roreltuten thu an thlung (riksu) a, chu chu an ram awp te chuan intiamkamna (mamitu) nen an lo pawm thin. Chutiang inremna chu  intiamkamna leh thutiam (riksu u mamitu) an ti thin. Ram leh ram, khawvel huap inremna ah erawh thu intiamkamna tur pahnih leh thutiam pahnih (two bonds and two oaths) a awm thin. He Mari document an tih a mi ang deuh tho hi Syria ho te zingah pawh kum zabi 18th A.D. thleng khan hriat a la ni a, Assuria leh Syria ram a Aramian te chanchinah pawh kum zabi 8th A.D. thleng khan kan la hmu thei.

Thuthlung Hluia a hman dan:

            Thuthlung (Berith) hi mihring leh mihring inkarah te (Gen 21:32), chi bik leh hnam inkarah te (ISam 11:1; Josh 9:6,15) hman a ni. Hetianga mihring inkara hman a nih chuan Pathian chu thuhretu atan hman a ni ngei thin (Gen 31:50), chutiang a nih tawh chuan LALPA thuthlung ti a sawi a ni tawh thin (ISam 20:8). Inneihna thuthlung pawh Pathian thuthlung tih a i thin a (Thuf 2:17), a chhan chu inneihna kha Pathian hminga tih a nih thin vang a ni.

            He thu hi Pathian, amah ngei mihringte hnena thutiam emaw, duhsakna thu emaw a a inpuanna/inlantirna ah hman a ni. Chutiang chuan tuilet hnua Nova hnena Pathian thutiam chu thuthlung tih a ni (Gen 9). Abrahama hnena Pathian thuthlung te (Gen 17, Lev 26:42), Puithiam nihna thuthlung te (Num 25:12,13; Deut 33:9; Neh 13:29), leh Sinai tlang thuthlung te kan hmu. (Ex 34:27,28; Lev 26:15). Chungte chu Israelte chanchin a a hnu lamah vawi tam tak tih thar leh a ni thin (Deut 29; Josh 1:1:24; IIChro 15; 23; 29; 34; Ezra 10:1; Neh 9:1). Mihring tihdan phung pangngai ang thovin Pathian Thuthlung intiamkamna nen kher an tinghet thin a (Deut 4:31; Sam 89:3), chutah chuan chhinchhiahna a tel ngei tur a ni (Gen 9; 17). Hei vang hian thuthlung chu Pathian �thurawn� �intiamkamna� �thutiam� ti a sawi thin a ni ta a ni. (Sam 89:3,4; 105:8-11; Heb 6:13-20; Luke 1:68-75). Tin, Pathian thuthlung reng reng hian malsawmna pek hi a keng tel ngei ngei thin bawk (Isa 59:21; Jer 31:33,34).

            Thuthlung tih thu hi chhun leh zan mumal taka inher chhuak thin te (Jer 33:20), Sabbath te (Ex 31:16), Serhtan te (Gen 17:9,10) leh Pathian thupek (Jer 34:13,14) sawi nan te hman a ni bawk.

            Chi thuthlung hian kumkhaw thuthlung, Chi hmanga chhinchhiah/nemngheh, huntiam awm lova thuthlun a entir bawk (Num 18:19; Lev 2:13; 2 Chron 13:5).

A pawimawhna:

            Thuthlung Hlui lamah hian Pathian thuthlung chhinchhiah tlak tak tak kan hmu a. Pathianin a mite hnena a thupek a ni fo thin a, Nova hnena thupek ang chi te Gen 9:9-17. Tui let laka a him theihna tur thupek leh tui a let leh tawh dawnloh thutiam a ni. Abramhama hnena Pathian thutiamah chuan a chhungte telin, nasa taka a thlahte tihpun an la nih tur leh, hnamte tana malsawmna an nih theihna tur thu a ni. Chu thutiam tih ngheh nan chuan serhtan tur thupek a awm leh bawk (Gen 15:18; 17:2-21). Israel hnam te tan Sinai (Horeb) tlangah thuthlung siam a ni a (Ex 19:5; 24:7-8; 34:10,27-28, etc.), halral thilhlan leh thisen theh hmanga nemngheh a ni (Ex 24:4-8). He thutiam hi Moab phaizawlah tih thar leh a ni nghe nghe (Deut 29:1). Hnam te tana thuthlungah hian mimalin hamthatna a nei bik ngai lova, hnam zinga mi leh chhungkaw zinga mi a nih chauhin a tan thuthlung chu a hlu thin.

            Tin, thuthlung pek a nih reng rengin malsawmna ringawt hi a tum a ni ngai lova, chu thuthlung vek chuan a duhlo, zawmlo tute leh hnawl tute tan rorelna tur thu a keng tel nghal thin. Adama hnena thuthlung te, Nova, Abrahama leh Israel hnamte tan pawh chu thuthlung mizia leh nihna chu a danglam ngai chuang lo.

            Mimal, tupawhin thuthlung avanga a dikna chanvo te a phatsan a, ngaihtuahna leh ruahmanna fel tak te nena Pathian (Yahweh) laka a hel chuan chumi chu hnam leh chhungkua ata paih thlak leh hnawl an ni thin a, hnam leh chhungkaw member an ni tawhlo tihna a ni (Num 15:30 f), Mimal, chhungkua leh hnam laka thuthlung pawimawhna hrang hrang pawh tam tak kan hmu. Deut 33:9; Jer 33:21; Mal 2:4 ff., Num 25:12-13, Josh 24, IISam 7 parallel IChron 17; Sam 89:3,28,34,39; 132:12; Jer 33:21) Anmahni leh an thlahte thleng pawha kumkhaw lalram, Pathian lakah pawh fate dinhmun an chan theih hialna tur thu a ni. Hun a danglam zel angin Zawlneite pawhin Thuthlung thar, Messiah hunlaia a rawn awm tur thu an la sawi lawk ta cheu bawk (Isa 42:6; 49:8; 55:3; 59:21; 61:8; Jer 31:31,33; 32:40; 50:5; Ezek 16:60,62; 20:37; 34:25; 37:26; Hos 2:18).

Thuthlung Thara a hman dan:

            Diatheke tih thumal hi Septuagint letling tuten thuthlung sawina Hebrai thumal Berith tlukpui atana an lo thlan, kan hman chhunzawm zel tak chu a ni a. Greek Thuthlung Hluiah hian vawi 300 vel thuthlung sawi nan hman a ni a, chutih lai chuan suntheke leh entolai (NT ah hman a nilo ve ve) tih hi vawikhat ve ve chauh hman a ni. He Diatheke tih thu an thlan nachhan ni a lang berah chuan Pathian in mihring te nen inremna thu a thlun hi indawr tawnna, in remsiam tawnna a nih loh avangin thumal dang suntheke leh entolai te nen a inmil theih loh vang a ni.

            Diatheke tih hi NT ah vawi 30 vel, thuthlung tih chauha lehlin theih turin hman a ni a. Gal 3:15 leh Heb 9:15-17 . Mi tam tak chuan inremna emaw thurochhiah tih a lehlin an duh zawk thin. Mahse, chutiang a nih vaih chuan Pathian duhdan liau liau a inremna siam a nihna hi a tih bo vek theih dawn bakah, a hmalama a thu kaldan nen a inrem theih dawnloh avangin a remlo a ni. Hebrai thumal berith nena inmil hle tura lehlin phei chu harsa tak a ni a, thenkhat duhdan angin thurochhiah tih hian dah nise chuan a thumal awmzia leh a dikzia sawina tura tanchhan te a tih bo vek theih dawn avangin thuthlung ti a lehlin hi a tha ber a ni.

Kan tana thuthlung thar chu eng nge ni?:

            Thuthlung thar ti a Pathian thuin a sawi hi a awmzia diktak hre thei tur chuan Genesis atanga kan chhui tan a ngai ang. Mahse, chung chu hetah chipchiar takin kan chhui hman lovang a, tawite in i han khaikhawm dawn teh ang.

            Khawvela mihring, tungchhova kal tawh phawt chu tisa danin nung mah ila, thlarau danah erawh Pathian thinurna avangin sual zungzam, min phuartu avanga mitthi kan nih tlat avangin (Sam 51:5, Rom 3:10-12, 5:12) tihnun kan ngai a. Min hringtu Diabola ta kan nih avangin (John 8:23,44) fate chan tur, Diabola ro, thihna chu kan luah ve tur a ni (Rom 8:17). Chumi a nih lohna tur atan chuan Pathianin thuthlung thar a siam theih nan thisen kaltlangin sualngaihdamna min lo pe ta a ni (Heb 9:22). Isaia 2:3 leh Mika 4:2 te, Joela 2:38 thu te a lo thlen theihna turin Pathian beramno, khawvel sual kalpui tu tur chu (John 1:29) hlanin a lo awm ta a ni (Heb 9:12). Chu thihna kaltlang chuan thuthlung thar, OT a zawlneite sawilawk, amah Lal Isua ngei pawhin a lo sawi hmawrhmuh tawh, tui leh thlarauva piantharna (John 3:3-5) kawng, miten an hriatthiam loh leh an hmuh thiam loh, thuthlung dang zawng zawng aia thuthlung tha zawk, mitin ta tur chu Pentecost ni ah an lo chang ta a. Lal Isua rinna avanga sualte simin, sual ngaihdam nana Lalpa Isua hminga baptisma chang, Pathian Thlarau thianghlim dawng tute an lo ni ta a ni. Chu chu Hebrai ziaktu chuan, �Pathian Fapa rap beta, thuthlung thisen amah tihthianghlimna chu thil narana ruat a, khawngaihna Thlarau tivuitu chu, chu mi ai chuan eng tia hremna nasa zawk nge tuar tlaka ruat tur nia inngaih?� (10:29) tih hialin a ziak a. Tui baptisma changa, Thlarau Baptisma chang tute hi Pathian hrinte an lo ni ta zawk a ni (Johana 1:12,13). Thlarauva, Pathian awmna tura thutak hmanga a din te kan ni (Eph 2:22).

            Tui Baptisma ah hian thuthlung a famkim emaw ti te kan awm fo thin, Pathian Thlarau Thianghlim tih thianghlimna leh tihnunna tello chuan kan famkim lo a ni tih kan hre reng tur a ni. Nau piang zawng zawng hian ro an luah ngai lova, roluah thei tura nunna nei tel ngei a piang te chauhin ro an luah thin. Piang mah ila, nunna kan nei si loh chuan fa hlamzuih, nauchhiatna rama piang ang chauh kan lo ni ang. Chuvangin nunna nei tel ngeia kan pianna chauh hian ro min luah tir dawn a ni. Chu chu Pathian thutiam, thuthlung thar, tui leh thlarauva pianna, Pentecost ni atanga ringtu kal hmasa ten an lo chan tawh thin ang ngei kha a ni e.