Pathian faka lam hi

A CHHIAR PEIH TE TAN

Pathian Faka lâm chungchang hi i han thai lang ve teh ang

(Mi tupawhin kan hriatpui leh kan pawmpui, harsatna nei te huam tel lovin)

Khawvel mihring te hian kan lawmna leh kan rilru hlimna tak tak kan tarlanna kawng in ang tlang tak chu LAM hi a ni awm e. Kan rilru in a beisei reng emaw, a beisei hauh loh pawh kan han hmuh/hriat/tawn thut hian thawklehkhata insum hman miah lova kan tih thin chu, kan zuang tawr tawr a, kan au a, kan lam thin. Thiante zingah pawh mite kan tihhlimna leh kan nuih dar dar na thin chu tute emaw an thiam ang ang a an LAM kan hmuh hian a ni fo thin.

Lâm hi midang kan lawmna, mahni lawmna leh kan rilru hlimna kan pho chhuahna hmanraw tangkai ber te zinga mi a ni. Chutihlai chuan khawvel thila lâm te, ram leh hnam thila lâm ah te hian kan duhdan leh kan rilru a thuhmun viau thin in a lang a. Mahse, Pathian faka lâm chungchangah erawh kan ngaihdan leh duhdan pawh a inanglo nasa hle thung.

Formula leh step dang tehchiam awm lem loh na, Pathian chawimawi a lâm ngailo, lâm thiamlo inti tam tak te hi Khawvel sawrkar leh pawl hruaitu (Minister, MLA etc.) te lo lawm na a eng hnam lâm emaw, harsa leh step tam tak tak nen lam lo bik nih hlauvin lam kan zir tlut tlut a, a hun a lo thlen a phur tak taka lâm tam tak kan awm tho ang. Tin, eng music emaw play a, lo rock viau tawh te emaw, fiamthu thawhna hmun a engemaw ti tala lâm lo thai tawh kan tam viau bawk ang.

Thiante nen han in tih hlim nikhua te, fiamthu leh phawk han chhuah nikhua pawhin kan theih ang angin kan lâm theuh tawh mai thei bawk. Mahse, engvangin nge Biak In-a hlasak chhunga kal kual mai hi harsa kan tih a, talent a ni, mi zawng zawng tan a ni lo tih phet kan tum thin.

Lâm rau rau ah chuan a awlsam ber hi kan dah harsa ber a, step tlem ber nisi hi step leh behbawm tam tak nei, lâm dang zawng aiin practice hrehawm kan tih tlat thin? Pathian faka lam a nih loh chuan kan boruak hap a zir te, a hun leh hmun a zir te in lâm hi kan harsat lo theuh si a, Biak In chhunga kal kual mai mai kan harsat em em te, tute emaw ta bik tur, talent a ni chuti khati kan tih fo na chhan hi enge ni ang le? A then chu kan intih pâ vang te, zakzum kan tih vang te, hrisello kan intih vang te pawh a ni maithei bawk. Mahse, in ti "pa" tak tak te hian Biak In chhunga kal kual mai kha engvanga "nu" ta riau a hria nge kan nih? Zakzum in ti tak pawh a thian kawm nel tak te bulah chuan Pathian vang hi hauh lovah a lam thei tho bawk si, ngaihtuah chian a ngai e.

Veng pakhata nu pakhat pawh MHIP thiltih leh thildangah pawh an fiamthu thiam leh thiante ti hlim tu a ni a, a lâm nasa thin khawp mai. Mahse Biak Inah chuan lâm zuk tum der lova,"Ka lam thiamlo, hetiang hi chu ka tih mi a ni lova, ka talent pawh a ni lo" zuk ti tlat pek a. Kan nungchang in a zirloh avanga kan lam hreh hi chu thudangah dah ta ila, chuti ni lem lova lam ngailo te hi enge kan lam ngailoh nachhan ni ta ang.

Mihring mithmuh leh kan thiante hmaah kan lam lova, Lalpa Pathian hmaah, amah chawimawi nan kan lam a ni zawk tih hi thinlung taka kan hriatchian tak tak chuan zah a awm thei lova, in tih "pa" a awm thei lova, "ka talent a nilo" tih a awm theilo bawk. Pathian kan chawimawina tur atan hian engin nge min dal? Eng hian nge harsatna min siam? Chutiang paltlang thei tura din leh siam RINGTU kan ni lovem ni?

Israel Lal, Davida pawh kha thuthlungbawm, Jerusalema lakluh a nih Ni khan a lawm avangin nasa takin a lam a, Lal a nihna leh a zahawmna, mi bik a nihna leh roreltu a nihna theihnghilh thak khawpin mipui ho zingah khan Pathian chawimawi nan nasa takin a lam a nih kha. (II Samuela 6:1-16)

A lam nalh vak lo a niang, Bible chuan "a zuang leh a lam chu a nupuiin a hmu" tih thu a ziak a. A nupui Mikali chuan a pasal, ram khat Lal ve meuh si, puanzaisin leh puithiam kawr chauh ha a nasa taka a lam a han hmuh chuan a pasal chu hmuhsitawm a tiin a lo zahpui hial a nih chu. Nupui tha niawm takin midang awmloh hnuah a pasal chu a han zilhhau a, "Vawiina Israel lal chu a va ropui ve le, mi ho tak zahnachang hre lo saruaka awm ang maiin vawiinah a chhiahhlawh nulate mithmuha saruakin a awm kha le," a lo ti a, mahse, Davida chhanna hi a va han ropui em! "Ka lam nalh lo a nimaw, ka lo lam thiam awm lo hle mai, miin min nuihzat ngawt ang," a ti miah lova, a nupui hnenah chuan, "I pa leh a chhûngte zwng zawng aia mi thlang a, LALPA mi,  Israelte chunga lala mi ruattu LALPA hmaah asin ka lam ni; LALPA hmaah chuan lam awm reng ka ni alawm, Hêng ai mah hian ka la zahpuiawm ang, keimah pawh ka la insit cheu ang; amaherwhchu chung chhiahhlawh nula i sawite chawimawiin ka awm ang," a han ti ngat mai a, a va han ropui em! Lalpa hmaa lam tur hian nalh a ngai lova, zei a ngai lova, mi mit lak leh miten thiam min tih a ngai lova, "Lalpa hi fak tur ka ni a, Lalpa chawimawi hi ka tih tur ngawih ngawih a ni" ti chunga thinlung taka Lalpa hmangaihna nena lam hi chu engtiang pawhin nise Lalpa hmaah chuan a lo mawi vek dawn a lo nih chu!

Ke pen rual leh rual loh lam a pawimawh lova, taksa then nalh thiam leh thiam loh a pawimawh lova, lam thiam leh thiam loh a pawimawh lova, style a pawimawh lova, miin nalh an tih leh tih loh a pawimawh lova, zeilo min tih pawhin awmzia a awm hek lo, a pawimawh ber zawk chu thinlung taka Lalpa fak leh chawimawi a lam hi a ni. Chutah chuan Lalpa a lawm a, Pathian a ropui a, Kohhran leh mimalah malsawmna tam tak luanluhna hnar a lo nih phah thin a nih chu.

Chuvangin, kan theih tawp leh kan thiam ang tawkin, chakna leh theihna kan neih a, kutke kim neia lam theia kan awm chhung chuan Lalpa fak leh chawimawi in i lam zel ang u. Mite ngaihdan ngaihtuah lo la, "Lalpa a lawm ang em?" tih chiah ngaihtuah rawh. I lam nalh leh nalh loh, i zei leh zei loh Lalpan a en lova, 'LALPA chuan Samuela hnenah, "A hmel lam emaw, a san lam emaw en suh... Lalpa chuan mihring en dan angin a en ve si lova, mihring chuan pawn lam lan dan an en thin a, LALPA erawh chuan thinlung lam a en zawk thin a ni," (I Sam 16:7) tih a ni zawk.

"Chutichuan Pathian hmaah mi tumah an inchhuang thei lo vang. (I Korinth 1:29)"