MIHRING MIHRINNA

 MIHRING MIHRINNA

Mahni inhriatchian tluka thil pawimawh, mahse, chu aia harsa si chu he khawvelah hian zawng ta ila, hmuh a har viau maithei. Tungchhova kal mihringte min ti mihringtu hi enge ni? Khawiah nge a awm? Engtinnge a awm? tih te kan ngaihtuah ngai em le? Mihring ti mihring tu chu kan hriat kher a ngai em ni? Enge kan hriat chu a tangkaina? Engtin nge kan hriat theih ang?

MIHRING CHU TUNGE/ENGNGE A NIH?

I inngaih ang kha i ni em? Miin an ngaih ang che kha i ni em? Khua a tha emaw, a chhia emaw, kawlphe leh khawpui ri inchhawn nawn awn awn hnuaia lo piang te, thalvaekchar lai leh thlasik kawngpui pawruih hnuaia lo piang pawh ni la, khawvel hian mihring nihna chu a pe che a, i hriat hma hauh atang khan mipakhatah chhiar i ni tawh tih hi i inhria em? Engahmah in ngailo pawh ni la, nangmah a mihrinna kha i paihbo thei chuang lova, i inngaih ang khan miin an ngai silo che a nih hi.

A harsa tiin hrehawm i ti thin em? Mi ropui, khawvela nawmchenna tinreng leh hahdamna tinreng nei a i ngaih, sum leh pai tam tak, in leh lo ropui tak tak din tute hi i lakah khan midang daih niin i ngai em? Silh leh fen tur mumal pawh neilo, sawtah, veng kel kilah, mi kawmkara mi dithlifarfem hnuaia nitin ei dap chawp, retheihna leh harsatna pawhin a kiansan ngai loh avanga mahni ta bik ang hliah hliah a pawm thlap tu, hnawm kara uihli ang leka inngai pawh ni la, khawvel miropui te nen hian paihbo theih loh leh hnial theih hauhloh in anna lian tak pakhat kan nei tih i hria em? Mi rethei i nih vang emaw, mi hausa i nih vang emaw, i thiamna leh finna leh thildang avang khan midang lakah danglam bik leh hrang bik riau in i inhria em?

America President leh India hmarchhak kilkhawr, state rethei takah, ba nei sa tun chunga piang nang leh kei hi Van hnuai khawvelah hian kan dang chuang lo, MIHRING a ni a, nangpawh i ni! A hahdam thlak deuh em? Pawm a awlsam deuh em? Chutiang ni mahse kan dinhmun a inthlau em mai tiin i la hnial fo em? Hei hi hria la, hriatna leh thiamna, sum leh pai hausakna, dinhmun hian mihring a siam lova, mihring te hian dinhmun kan siam zawk a ni tih hi.

A chhia leh a tha i hriat a, tisa taksa i neih a, nunphung pangngai a nung thei a i awm a, a lum leh vawt hria in, riltam leh puar inthlauh zia hmu chiangtu i nih a, a chhe lam leh a tha lam zawng pawha i rilru i ngaihtuahna i sen theih chuan MIHRING i ni tih hi i inpawm ngai miah lova i nihna a ni e. I pawm loh pawha i nih tho dawn si avangin pawm mai la, i damrei phah em a nih loh pawhin i tan a tha ang.

ENG NGE I AWMZIA?

I ngaihtuah ve ngai em? He nun mawlmang tak ni a lang, hla siamtu ten "Thi turin kan lo piang a, nung turin kan thi leh thin" an tih mai ah hian hringnun awmzia a kim in i hre thin em? Hringnun awmzia hriatthiam tumin i ngaihtuahna i lo seng ve tawh thin em? Engmah tih tur leh mawhphurhna pawh nei lem lo, khuarel kalphung (nature) pangngai anga khawvel inher mup mup ah hian tihpalh thilthu a lo piang ve mai i ni em? I nunah khan midangin pawimawhna an nei lova hria in, mahni sahmim ti puar tur a lo chawr chhuak ve ngawt niin i inhre thin em?

Pu Vanneihtluanga chuan "Khawvel lawm nan a lo kal a, amah lawm nan kan khawvel thung a" a tih te hian kan nun a sawifiah in kan hria em? Khawvel kan tehna chu engpawh nise, kan nundan a khawi lai tak hian nge keimahni a keimahni hi hrilhfiah ang? Khawvel mifing ropui, Descartes chuan,"Keimah a keimah chu ka ngaihtuahna ka hman theihna hi a ni, keimah tel lovin ngaihtuahna ka hmang theilo, ngaihtuahna hmang theitu chu keimah ka ni" a lo ti a. Miin a finna leh hriatthiamna hloh a, mi â a lo nih hian mihring chu a la ni reng a. Taksa chu vaivuta kir leh tura nunna neilo a nih hian mihring a tlinglo kan lo ti thin a ni lawm ni? Mahse, kan taksa luahtu kan NUNNA chauh chu taksa tel lovin mihringah kan chhiar leh bawk si lo. Khawvel finna leh thiamna nen, mi ropui tak tak ten theory hrang hrang hmangin MIHRING MIHRINNA hi hrilhfiah an lo tum tawh thin a lawm. Mahse, Ni hnuaia hmeichhe hrin zingah khawvel duhkhawp chhanna pe thei reng reng zuk awm lova, a ni, ka ti leh pek thin ang, an la awm ngailo tak tak.

Engatinge thenkhat an nuih laiin kan tah? Engatinge thenkhat an lawm laia kan lungngaih? Engatinge thenkhat nuamsa taka an awm laiin thenkhat hrehawm taka kan awm? Hringnun hi a fair thlawt lo tiin siamtu Pathian leh he khuarel dan zam sa, i tih danglam theih hauhloh tur hi i chhuahchhal in i haw thin em? Hringnun awmzia hrefiah thiam tura zirtur, chhuk leh chho awm thin te hi i zir chiangin i belchiang thin nge, ninawm leh hahthlak, rapthlak tiin i thukhum chhah i chhawn thin? Chutianga i tih avang chuan MIHRING MIHRINNA hi hre fiah sawtah i inngai em? I dinhmun tak zawk chu khawvel tisa lak atanga hla tial tial in, hmuh theih leh khawih theih hringnun chu hriatfiah a hnekin i hmu fiahlo tawlh tawlh zawk a ni. Hringnuna harsatna leh buaina hmachhawn ngailo mi i nih chuan MIHRING MIHRINNA hi i hmufiah thei ngai lovang. Zir lovin tunge pass thei a, zir lovin tunge hrethiam thei?

Tomato hmin tai tha tak tak i lei dawnin enge i mit la ber thin? A tha tam tak kara a tawih pahnih khat lek khan i mit a la a ni lawm ni? Mi fel sim leh chuan tur neilo sangkhat aia misual pakhat langsar thin hi enge a chhan? Rukru, tualthat etc. an man a, anni aia tha leh fel khawtlanga kan kuh tel tul chung pawhin misual pakhat avanga mualphona hi mi sang tam tak te chungah tla a hria in, phur takin "Kan khawtlang mi a ni love, kan hre ngai love" i ti ve thin em? Chu chuan engmah a siamtha chuang si lo. Thil tha leh mi tha sang tam tak avanga lawm nachang hre lovin, misual pahnih khat avangin eng vangin nge i lungngaih thin? Lawmna nei thei miah lova i vui leh vai na thin kha enge a chhan? Thil dang a ni love, hringnuna MIHRING MIHRINNA hi i la hmu pha lo tihna a ni ngei ang.

Thufing pakhat chuan, "A chhe lam thlir mi tan chuan kawngkharah hian a kalhna a awm a, a tha lama thlir mi tan chuan a pawh hawnna a awm" an lo ti mathlawn lovin, a tha sang tam tak avanga lawmna hlado chham mai lova, a chhia pahnih khat lek avanga lungngaihna puandum silh hi MIHRING MIHRINNA awmzia a ni e

ENGTINNGE I TIH TAK ANG?

I chhiar tak atang khan mifel aia misual lansarhna hringnun, a tha aia thalo hmuh tum thin mihring, dawt thu dingchang a, thutak kawngsira a leh reng na platform kha kalsan turin chakna i insiam thei ta em le? I la theilo fo a nih chuan chu hringnun buaina zirlai chu i la zir zo lo, i zirlai atan buaina leh manganna, a thalo lam (negative side) tam zawk i la mamawh a ni tih hria la, chutiang tawk tur chuan inbuatsaih thuai thuai ang che.

Nimahse, chu nun chu hrethiam a i inngaih a, hmuchianga i inhriat tawh chuan i zirlai (subject) thar tur, MIHRING MIHRINNA in a chhawpchhuah sak che hi zir turin inbuatsaih nghal ang che. Chu chu enge ni i ti maw? A tha lam leh dik lam hmuh theihna tarmit vuah i zir dawn mawle!

Kha le, zir tan rawh le. Thil dik min hmuh tirtu che chu enge? Thil tha hriattir tu che chu enge? Mawi leh nalh i thlan theihna chhan kha enge? Hmasawnna kawng zawh tura nawr tu che kha enge? Hriatna leh thiamna zawn tirtu che kha enge? Chung zawng zawng chhanna chu i subject zir zawh tak, passed-a i inngaih tak kha a ni e. Chu chu i vuah thiam phawt chuan harsatna leh chhiatna avanga khuarel dan zam sa leh i siamtu i lo mawhchhiat aia nasa khan, lungawina leh lawmna nei chungin hringnun tawlailir hi khalh dan i thiam tawh ngei ang. J.F. Newton-a'n, “Mihring hian nundan a thiam a, hmangaihna a hriat a, beiseina a neih a, tawngtai dan a thiam a, thih hlauh lohna chang a hriat hunah chauh mithiam a ni thin.” a tih hi i nihna a ni ve thei maithei a sin.

Thildik hriatfiah tir tu che chu thildiklo lo thleng thinte hi a ni a, thil tha hmuh tirtu che chu thilthalo lo langsar thin te kha a ni. Tawp (trawp) hnawk leh bal te hian thil mawi leh nalh chu a nihna lairil zawk min zuk kawhhmuh tlat pek a! Hmasawn ngailo/theilo mihring leh ram i hmuh avang khan hmasawn duhna thinlung i nei tih hi pawm mai rawh. Finna leh hriatthiamna nei theilo mihring, i bula mite avang khan hriatna leh thiamna ah i tuihal a, i zawng a ni lawm ni? Natna leh lungngaihna te hian damna dawi tha ber ber hmuchhuak turin min khalh kal reng a lo ni a lawm! Na ngailo ila, chhiatna leh harsatna thleng ngailo se, lungngaihna leh manganna tawk ngailo ila, lei mihring ten hmasawnna, changkanna leh thiamna khawl thil chitinreng te hi kan neih ngailoh leh kan hriat ngailoh tur te an ni. Chuti a nih chuan tarmit pakhat hmanga THILTHALO ni a i hriatte kha i thlirna tarmit i thlak thiam chuan i tan ZIRTIRTU THA an lo chang tawh ang. Buaina leh manganna khawvel, thil tha reng reng awm lohna nia i ngaih hmang khan hahdamna, hlimna leh lawmna, thiltha chu zir chhuak la, midangte pawh chutiang ti turin zirtir ve ang che.

Chu chuan MIHRING MIHRINNA, famkim theilo famkim tum, engkim hre theilo engkim hriat tum, chawl theilo chawlh tum si hi a hmuhfiah tir ang che 'nga, mawhphurna neilo MIHRING ni a i inhriatna kha a paihbo sak ang che. He khawvela i lo pianchhuah ve ngawt nachhan, i hriat theih ngailoh chu heihi a ni, THILTHA TI TURA SIAM tih mai te hi. I Pathian leh midang tan thiltha ti turin i puanven sawichhing la, i mawhphurhna hria in tlanchhiatsan ngai suh ang che. A chhe lai siamtha tu, mi awmna tura kawngte siamtu tih hi i nihna tur a ni e.

THO LA, DING TA CHE!

"Ka hrethiam ta, ka hrethiam ta" tiin au mai rawh, miin mak tiin zui che rawh se. Mihring nun panngai kal pel niin ngai che rawh se. Chumi atang chuan hringnun zirlai i pass tak te kha zirtir in hrilh la, MIHRING MIHRINNA pangngai i kal pel tawh a, mi pangngai i ni tawh lo, mi pangngai chunglam i ni tawh a ni tih hi hriattir mawlh rawh, tichuan, nang erawh chu engkimah fimkhur la, chutiang thil tiin awm reng ang che. Mawhphurhna neilo mihring a awm theih lova, hringnuna mawhphurhna nei lova inhria chuan mihring nih a la tlinglo tih hi kan pawm ngei a ngai ang.

Hringnun awmzia i zir chhuak a, hringnun chhiarkawp i man thiam a, a formula leh a solution pawh i hmu ta. I mawhphurhna hria la, mawhphurhna hlen ngam, mi huaisen nih tum tlat ang che. Harsatna leh manganna te, lungngaihna leh buaina te hian i hringnun awmzia hrilhfiah che a tum a ni tih hria la, engtiklai mahin i tukhum chhawn ngai suh ang che. Zirtirtu hrawn hrehawm tak hnen atang pawh hian hmasawnna tur rophumruk haichhuah tur a awm vek a nia.

I zirlai i passed tak te kha midang zirtir turin i MIHRING MIHRINNA kha kaitho la, khawmuang tawh suh. Ka hmu ta ti a i inkuangkuah mai chuan a bul atanga i zirlai tan that leh hmabakin i awm leh nghal tih hria la, hringnun khawvel bial pup mai ah i tang ang a, chuta ta chu chhuah tih ni awm lovin chu circle of life ah chuan i kual kumkhua tawh ang. Chumi i nih lohna tur a tan chuan Mother Teresa chuan, "Nimin hun a liam tawh a, naktuk lah a la rawn thleng silo, chuvangin kan neih awmchhun chu tunhun chauh hi a ni" a tih hi vawng reng la, i neih chhun, TUNAH ngei khan i hna thawk nghal la, MIHRING MIHRINNA thu hi puangchhuak ang che